Qanoq iliorlunga suliffissamut qinnuteqassaanga?
Maani suli.gl-imi suliffissamut ussassaarummik nassaaruit ilinnut naleqqulluartutut isigisarnik, taava nittartakkami matumani ussassaarummut toqqaannartumik qinnuteqarsinnaavutit. Periaatsit assigiinngitsut atorlugit qinnuteqaateqartoqarsinnaavoq, tamannalu suliffeqarfimmit nutaamik sulisussarsiortumit aalajangerneqartarpoq. Tamanna suli.gl-ip nammineq e-mail-imut periaasia aqqutigalugu pisinnaavoq imaluunniit nittartakkamut allamut link aqqutigalugu tassani periaaseq atorlugu qinnuteqarfigineqartussaasinnaalluni. Aamma imaassinnaavoq sianertussaasutit, allakkatigut qinnuteqaammik nassiussisussaasutit, imaluunniit sulisitsisumut orniguttussaasutit, kisianni periaatsit taakkua atorneqartarnerat akuttuvoq.
Suli.gl-imi jobagent-inik aamma sanasinnaavutit. Qanoq iliorluni jobagent-iliortoqartarnersoq takusinnaavat uani. Taamaaliornikkut suliffissaasinnaaut illit e-mail-ernut toqqaannartumik nassiunneqartarnissaat qulakkiissavat, imaluunnit Suli.gl-imut iseruit uani “Quppernera” saaffiginnissutit takusinnaassallugit.
Suliffissarsiornerni, jobagent-erni allanilluunniit ajornartorsiuteqaruit ikiorneqarnissamik pisariaqartitsillutit, e-mail-imik uunga suli@nanoq.gl nassiussisinnaavutit imaluunniit najukkarni Suliffissarsiuussisarfimmi siunnersortimik attaveqarsinnaallutit.
Qinnuteqaammik nassiussereeruma, taava qaqugu tusagaqassaanga?
Suli.gl suliffissanut nittartakkanut atorfinnut inuttaqanngitsunut ussassaaruteqarnissamut taamaallaat periarfissaqarpoq. Qinnuteqaateqareernerup kingorna attaveqarneq tamaat suliffeqarfiup akisussaaffigaa. Suliffeqarfiit ilaasa attaveqarfissamut paasissutissat ussassaarummi ilanngullugit allattarpaat, taamaalillutit nammmineerlutit attaveqarnissamut periarfissaqarputit.
Paasissutissanik pissarsinissat aammalu qinnuteqaativit aamma cv-erpit malinnaaviginissaat illit nammineerlutit akisussaaffigaat.
Suli.gl sunaava?
Suli.gl tassaavoq Kalaallit Nunaat tamakkerlugu suliffissanut nittartagaq. Suliffissanut nittartagaq nunatsinni innuttaasunut aamma suliffeqarfinnut tamaginnut atugassiaavoq aammalu suliffissat suut innuttaqannginnersut, nunami sumi inissisimanersut aammalu suliffissami qanoq piumasaqaateqartoqarnersoq, pitsaasumik paasissutissiiviulluni. Suliffissanut nittartakkami suliffeqanngitsut suni piginnaasaqarnersut nunatsinni sulisitsisunut paasisimaarinnitsitsilluassaaq. Suliffeqanngitsut ajornanngitsumik ilisarnaatiliorsinnaapput aammalu CV-iliorsinnaallutik, taamaalilluni suliffeqarfiit ajornanngitsuaqqamik nassaarisinnaassallugit. Suliffeqarfiit ilisarnaatinik piginnaasaqarfinnillu aalajangersimasunik ujaasisinnaapput aammalu mail-ikkut imaluunniit oqarasuaatikkut suliffeqanngitsoq toqqaannartumik attaveqarfigisinnaallugu.
CV-era suli.gl-imut ikkussinnaavara?
Aap, taamaaliorsinnaavutit. Tamanna imaaliornikkut pisinnaavoq:
- Nammineq allalluni
- CV-it LinkedIn-imi ilisarnaaterniit aallugu
- CV-nnngortitsisarfimmi word imaluunniit pdf atorlugu allakkiaq ikkullugu
Qanoq iliorlutit CV-liussanerlutit takuniarukku, taava uani toorsinnaavat. Eqqumaffigissavat taamaaliorniaruit NemID atorlugu isernissat pisariaqarmat.
Suli.gl aamma akeqanngitsumik CV-inut tulluartussarsiuussinermut sullissiveqarpoq. CV-erpit tamakkiisumik immersorsimanissaa aammalu ikkusimanissaa isumagiinnassavat, taava suliffissavit nassaarissaqqaarpaatit. Aamma piffissap ilaannaa suliffissarsioruit, siullermeertumik suliffissarsioruit, piffissaq tamaat suliffissarsioruit, imaluunniit immaqa suliassaqarfimmi nutaami pissanganartumi siornatigut suliffigisimanngisaannagarnik ujarlerlutit allarluinnarmik misiliiniaruit, tamanna tamatigut atuutissaaq.
Kalaallit Nunaanni sulisinnaavunga?
Danskisut innuttaassuseqartuunngikkuit, imaluunniit EU-p avataani nunamit allaminngaaneersuuguit, Kalaallit Nunaannukarnniarlutit visum-imik qinnuteqassaatit. Una alakkarsinnaavat http://naalakkersuisut.gl/da/Naalakkersuisut/Departementer/Udenrigsdirektoratet/Rejser-til-og-fra-Groenland/Rejse-til-og-ophold-i-Groenland imaluunniit www.nyidanmark.dk aammalu Kalaallit Nunaannukartarneq Kalaallit Nunaanniittarnerlu pillugit paasissutissanik annertunerusunik pissarsillutit. Taakkua naammassineqarsimanngippata, qinnuteqaatit itigartinneqassaaq.
Sulisitsisutut suliffissamut ussassaarutinga suli.gl-imi allagarsiissutigisinnaavara?
Aap, taamaaliorsinnaavutit! Taamaaliussaguit suliffeqarfiuterpit Kalaallit Nunaanni Inuussutissarsiummik ingerlataqartunik Nalunaarsuiffimmi nalunaarsorsimanissaa aammalu GER normoqarnissat pisariaqarpoq. Tamanna aamma isertaat kode sulinal.nanoq.gl-imi atortakkat suli.gl-imut iseruit atussuatit. Kalaallit Nunaanni Inuussutissarsiummik ingerlataqartunik Nalunaarsuiffimmi nalunaarsorsimaguit aammalu GER normut allareerukku, ingerlaannaq suliffeqarfippit ikkunnissaanut ingerlaqqitsinneqassaatit. Tamatuma kingorna suliffissamut ussassaarutit pisariaqartitatit tamaasa sanasinnaalissavatit. Taakkua tamarmik uani ”Quppernera” sananeqarsinnaapput, taannalu uaniippoq.
Isumannaallisaaneq aamma ussassaarutit akuerisaasut
Suliffissat allagarsiissutigineqartut tamarmik akuerisaasuunissaat, piviusuunissaat aammalu Kalaallit Nunaanni inatsisit naapertorlugit ingerlanneqarnerat qulakkeerniarlugu suli.gl-imi pisinnaasarput tamaat iliorniarsarivugut. Peqatigisaanik suliffissat allagarsiissutigineqartut akuttunngitsumik misissortarpavut, aamma avataaneersunik sulisussarsiornissaq pillugu qinnuteqaateqarnermut atatillugu.
Suliffissaq imarisaannut, piumasaqaatinut immikkuullarissunut, suliffeqarfimmut allanulluunniit tunngatillugu eqqumaffigisariaqaripput illit sulisitsisutut/suliffissarsiortutut isumaqaruit, uunga allassaatit suli@nanoq.gl, imaluunniit siunnersortimik oqaloqateqarniarlutit najukkarni Suliffissarsiuussisarfik attaveqarfigissavat.
Suli.gl-imi Jobnet-imiit allagarsiissuteqarpa?
Aap! Kalaallit Nunaanni suliffissat pissarsiarineqarsinnaasut amerlasuujunissaat qulakkeerniarlugu Suli.gl-imi Jobnet-imit suliffissat naleqquttut aaneqarsinnaanngorlugit atugassiisoqarpoq. Suliffissat taakkua Suli.gl-ip suliffissanut toqqorsiviani inissinneqarput. Tamatuma kingunerisaanik Kalaallit Nunaanni suliffissat tamarmik www.jobnet.dk (imaluunniit sulisussarsiortarfimmit allamit, allagarsiissutinik Jobnet-imut nassiussisartunit) aqqutigalugu pilersinneqartut, ingerlaannaq Suli.gl-imi allagarsiissutigineqartarput.
Jobnet-imi allagarsiinissamut isersinnaaniarluni, suliffeqarfik Jobnet-imi atuisutut pilersissimassaaq. Atuisutut pilersitsineq internettikkut taamaaqataanik uani www.jobnet.dk pissaaq. Allagarsiissutissat Jobnet-imi ikkunneqarpata, taakkua Jobnet-imi suliffissanik akuersisartumit akuerineqaqqaassapput, aatsaallu tamatuma kingorna Suli.gl-imut ingerlateqqinneqassallutik. Akuersiniarneq nalunaaquttap akunneri 24-it tikillugit sivisussuseqartarpoq. Jobnet-imit Suli.gl-imut nuussineq nalunaaquttap akunneri 6-ikkaarlugit pisarpoq.
Jobnet pillugu paasissutissat annertunerusut nassaarikkit uani: www.jobnet.dk