sullissivik.gl
Ussassaarut taanna oqaatsini makkunani nassaassaavoq
Malugiuk atorfimmut allagarsiissutaasumut matumunnga piffissaliussaq naareerpoq!
Atorfimmut allagarsiissutaasumut qinnuteqarnissamut piffissaliussaq qaangiutereerpoq, aammalu atorfik qinnuteqarfigineqarsinnaajunnaareerppoq. Allagarsiussaq innersuussivittuinnaq takutinneqarpoq.

ALLAGARSIUTEQQITAQ: Naalakkersuisut Siulittaasuata Naalakkersuisoqarfiani Inatsiseqarnermut immikkoortortaqarfimmi inatsisileritooq

Namminersorlutik Oqartussat

Nuuk
Ikkunneqarpoq: 05-09-2022
Piffissaq atuuffissaa naassaaq: 26-09-2022
Suliffissamut ID normut: LJA-84000454
Suliffiup suussusaa: Tamakkiisoq
Suliassaqarfik: Politi, illersornnissaq & eqqartuussiveqarneq

Inatsisilerituumik pikkorissumik pisortat ingerlatsinerannik paasitinneqarsinnaatitaanermut inatsisinut, atituumik isigalugu soqutiginnittumik ilisimasalimmillu Naalakkersuisut Siulittaasuata Naalakkersuisoqarfiani Inatsiseqarnermut immikkoortortaqarfik sulisussarsiorpoq. Inatsiseqarnermut immikkoortortaqarfik qitiusumik allaffeqarfimmi qitiusumi inatsiseqarnermut immikkoortortaqarfiuvoq, taamaattumillu suliassat assigiinngitsorpassuarnut tunngassuteqarput. Inatsiseqarnermut immikkoortortaqarfiup suliassai aalajangersimasut ilaatigut tassaapput inatsisinik maleruagassanillu inatsisilerinikkut pitsaassutsinik qulakkeerineq, Inatsisartut ataatsimiinnerinik ataqatigiissaarineq aamma inatsisilerinikkut allakkianik akissutissanillu suliaqarneq.

Naalakkersuisut Siulittaasuata Naalakkersuisoqarfia
Naalakkersuisut Siulittaasuata Naalakkersuisoqarfiata Naalakkersuisut Siulittaasuat (Kalaallit Nunaanni naalakkersuisut siuttuat) sullippaa. Naalakkersuisut Siulittaasuata Naalakkersuisoqarfianiipput Pisortat allattoqarfiat, Inatsiseqarnermut immikkoortortaqarfik, Ingerlatseqatigiiffinnut Allattoqarfik, Tunngaviusumik inatsisissamut immikkoortortaqarfik aamma HRU-mut allaffik. Tamatuma saniatigut Digitalinngorsaanermut Aqutsisoqarfik Naalakkersuisut Siulittaasuata Naalakkersuisoqarfiata ataaniippoq.

Inatsiseqarnermut immikkoortortaqarfik
Inatsiseqarnermut immikkoortortaqarfiup suliassaanni ilaatigut ilaatinneqarput:

  • Ikiuulluni inatsisinik piareersaalluni suliaqarneq kiisalu Naalakkersuisoqarfiit ataasiakkaanut aamma Inatsisartut allaffeqarfianut kiisalu danskit oqartussaasuinut suliniutinik suleqateqarneq.
  • Inatsisartut inatsisissaannut siunnersuutinik, Namminersorlutik Oqartussat nalunaarutaannik, Kommunini ileqqoreqqusanik aammalu suliassaqarfiit akimorlugit kaajallaasitanik inatsisilerinikkut pitsaassutsinik qulakkeerineq, kiisalu taakkuninnga aalajangersaasarneq atuutilernerinillu nalunaarutiginnittarneq.
  • Naalakkersuisut aamma Naalakkersuisoqarfiit inatsisilerinikkut siunnersorneqartarnerat, ilanngullugit inatsisilerinikkut allakkianik akissutissanillu suliaqarnermi.
  • Naalakkersuisoqarfiit akimorlugit pisortat ingerlatsinerannut inatsisitigut suliassat.
  • Inatsisit pitsaassusissaat aamma inatsisiliornermi suliat ingerlaneri, suliassanik suliarinninneq allallu inatsisilerinermi qulequttat pillugit pikkorissaanerit.
  • Naalakkersuisut aamma Inatsisartut akornanni inatsisiliornermi suleqatigiinnerup tunngavissinnissaa, ilanngullugu ataatsimiititaliani inatsisinik piareersaasartuni peqataaneq.
  • Inatsisartut ataatsimiinnerinik ataqatigiissaarineq, ilanngullugu Naalakkersuisut ataatsimiinnerni saqqummiussassaannik nalunaarutiginninneq.
Inatsiseqarnermut immikkoortortaqarfimmi inatsisilerituutut Naalakkersuisut Siulittaasuata Naalakkersuisoqarfiani unammillernartumik ineriartortuartumillu suliffeqalissaatit.

Sulisussarsiorpugut
  • Inatsisilerituumik (cand.jur.) atuagarsornikkut pitsaasunik tunuliaqutaqartumik. Ilinniarnerminni naammasserlaat aamma atorfimmut qinnuteqarnissamut kajumissaarneqarput.
  • Pisortat ingerlatsineranni paasitinneqarsinnaatitaanermut inatsisinut suliatigut soqutiginnittumik kiisalu politikkimut inuiaqatigiinnilu pissutsinut soqutiginnittumik.
  • Suleqatigiit inatsisilerinikkut suliaqarnissamut toqqammaveqarluartut tunniussimasullu amerlanngitsut akornanniikkusuttumik.
  • Suleqaternut suleqataallaqqissumik, isumasioqataallaqqissumik ilisimasannillu avitseqateqallaqqissumik.
  • Oqaluinnarnikkut allattariarsornikkullu attaveqaqateqallaqqissumik.
  • Qiimasumik aammalu sullivimmi avatangiisini persuarsiorfiunngitsuniinneq nuannarinnittumik.
Danskisut/Kalaallisut marloqiusamik oqaaseqartuuneq iluaqutaassaaq.

Aningaasarsianut atorfininnermullu tunngasut
Aningaasarsianut atorfininnermilu atugassarititaasut, ilanngullugit atorfininnermi soraarnermilu akiliunneqarluni angalaneq aamma pequtit nuutinneqarneri, Namminersorlutik Oqartussat aamma kattuffiup isumaqatiginninniarsinnaatitaasup pineqartup akornanni isumaqatigiissut/sulisartut isumaqatigiissutaat atorfininnerup nalaani atuuttoq naapertorlugu pissapput.

Qinnuteqartunut naammattumik naleqquttumik misilittagalinnut immikkut siunnersortitut atorfininnissaq periarfissaqassaaq.

Sulisunut inissiamut periarfissat
Atorfimmut atasumik maleruagassat sukkulluunniit atuuttut malillugit sulisunut inissiamut pisatsersugaanngitsumut innersuussisoqarsinnaavoq. Ineqarnermut akiliut aamma qularnaveeqqusiussaq inissiamut innersuunneqartumut maleruagassat sukkulluunniit atuuttut malillugit akilerneqassapput. Sulisunut inissiaq atorfeqarnermut atatinneqarpoq, aammalu atorfeqarunnaarnermi qimanneqassalluni.

Inissiap pisoqaassusaa, piginnittunut tunngasut il.il. apeqqutaallutik ineqarnermut akiliut aamma inissiap pitsaassusaa assigiinngitsuusinnaapput. Ataavartussamik sulisunut inissiamut innersuunneqarnissamut utaqqisoqarsinnaavoq, taamaattumik utaqqiisaasumik inissiigallartoqarsinnaalluni, ilanngullugu aamma najugaqaqatigiiffinni minnerusuni imaluunniit akunnittarfiit inissiaataanni, taakkualu akileraaruserneqassallutik.

Sulinngiffeqarnissamut periarfissat

Danskit naalagaaffianni kiisalu Danmarkimi kommunini atorfillit Namminersorlutik Oqartussani atorfininnerminnut atatillugu piffissamut killiligaanngitsumik sulinngiffeqarnissamik periarfissaqarput.

Qinnuteqarnissamut killiliussaq: Ataasinngorneq ulloq 26. septembari 2022, nal. 12:00.

Atorfininnissaq: 1. novembari 2022 imaluunniit isumaqatigiissuteqarneq malillugu.

Atorfinitsitsinissamut oqaloqateqarnerit sapaatit akunneranni 39-mi ingerlanneqassapput.

Paasissutissat annertunerusut
Atorfik pillugu paasissutissanik erseqqinnerusunik kissaateqaruit Inatsiseqarnermut pisortaq Jógvan Svabo Samuelsen saaffigisinnaavat uunga e-mail: josn@nanoq.gl imaluunniit oqarasuaammut (+299) 34 51 31.

Inuit akornanni attaveqaatit
LinkedIn-mut ikkuguk
Google+-mut ikkuguk
Suliffeqarfiup inissisimaffia