Allagarsiuteqqitaq - Uummannami Innaallagisserisussarsiorpugut

Taamaappat periarfissaqarputit ingerlatsinermi pitsanngorsaanermilu sunniuteqassallutit, kiisalu innaallagissamik pilersuinermi innaallagissamik systemi innaallagissiorfinni Uummannami nunaqarfiinilu tallimaasuni inerisaassallutit.

Aana ulluinnarni suliassat

Innaallagisserisut sulileruit suleqatigiit pikkorissut, suliffimminut tunniussimasut ilakkuminartullu suleqatigilissallugit. Allaffissornerup iluani piginnaasavit aammalu pikkoriffivit atornissaanut periarfissaqassuutit. Suleqatit assigiinngitsunik tunuliaqutallit suleqatigissallugit attaveqaqatigissallugillu misigissavatit.

Ingerlatsineq qulakkeerlugulu taarsersugassat ukkatarineqassapput, tassanilu uagut atorfissaqartipparput illit piffimmi atorfissaqartinneqartut misissussagitit pitsanngorsaanermilu siunnersuuteqassallutit. Makkuninnga ilaatigut suliaqalissaatit:

·Illoqarfiup nunaqarfiillu innaallagiap sakkortuup sakkukitsullu ingerlavii kiisalu aqqusinerngit qulliit

·SRO-anlæg

·Ingerlatsinermik piffissamillu killiliussamik misissuinerit, innallaagissamik pilersuinermi atortuinilu

·Atortunik atorluaaneq, teknikkikkut illuutitigullu atorluaanissaq pitsanngorsaanissarlu

·Nutaaliorlutit qulakkeerinnissallutillu tunisassiorfiit, teknikkikkut atortut paarilluagaanissaannik eqqiarsimanissaat Nukissiorfiillu avammut takujuminartuunissaannik

·Atortut paasissutissartaasa nalunaarsorneqarneri uppernarsarneqarnerilu teknikkikkut database-mi suleqatigiinnut uppernarsaatitut takussutissaalluarnissaat

·Pilersaarusiat nutaat iluarsartuullugit, ilanngullugit pitsanngorsagassat nutartigassallu, ingerlatsinermut akisussaasoq suleqatigiinni aqutsisoq peqatigalugu isumasiorlugu, qulakkeerniarlugu pisortat piumasaqaataat KLS naapertorlugu eqquutsinneqarnissaa.

Ujartugarput

Innaallagisserisutut atorfimmi takorloorparput illit inuttut ilisarnaatigissagit, suliamik aalajangersimasumik suliaqartillutit namminersullaqqittuunissat, kisianni pisariaqartillugu aamma suleqatigiinni suleqataasinnaasutit.

Nutaaliullaqqillutillu eqeersimaartuuvutit periarfissanillu takunnillaqqillutit killilersuisut pinnagit, aamma:

·Teknikkikkut ilinniarsimavutit innaallagisserisuullutit imaluunniit allatigut naleqquttumik ilinniarsimallutit SRO atortunik ilisimasaqarlutit

·Kalaallisut qallunaatullu oqalullutillu allassinnaavutit

·Biilernermut allagartaqarputit

·IT-mik atuineq ilisimasaqarfigivat

·Uummannami najugaqaqqusaavutit

·pisariaqartitsineq naapertorlugu pigaartutut ilannguttarnissat

Suliffinnut atatillugu nunap immikkoortuani, nunap immikkoortuinut allanut aammalu Nuummi qullersaqarfitsinnut angalasarnissat naatsorsuutigissavat.

Akissaatitigut atorfeqartitaanermilu atugassarititat

Akissarsiat atorfininnerlu isumaqatigiissut naleqquttoq atuuttorlu naapertorlugu ingerlanneqassaaq.

Qaammatit pingasut misilitsiffiussapput.

Atorfimmut atatillugu inissamik innersuussisoqarsinnaanngilaq.

Malittarisassat atuuttut naapertorlugit sulilernermi suliunnaarnermilu akeqanngitsumik angalasoqarsinnaavoq. Imatut paasineqassaaq, uagut timmisartukkut billetsissatit ilaquttannullu isumagissagipput. Aamma isumagissavarput containerimik pajunneqarnissarsi nutserisartullu poortugassat puujagassallu isumagissavaat.

Paasisaqarnerorusuppit?

Suli apeqqutissaqassaqaatit Kalaallit Nunaat imaluunniit suliffigiligassat pillugu, taamaattumik Suleqatigiinni aqutsisoq Johan Becker, oqarasuaatikkut uunga +299 28 86 71 sianerfigisinnaavat imaluunniit allaffigalugu e-mail jbeck@nukissiorfiit.gl.

Akissarsiat atorfeqarnissarlu pillugu naliginnaasunik apeqqutissaqaruit uunga nassiussinnaapput hr@nukissiorfiit.gl.

Nukissiorfiit pillugu

Nukissiorfiit Kalaallit Nunaat tamakkerlugu innaallagissamik, imermik aamma kiassarnermik pilersuisuuvoq. Suleqatigiilluta piffissaq tamakkerlugu aningaasartuutinik atorluaanissaq aamma piujuartitsineq tunngavigalugu aaqqiinissat atuisartutsinnut iluaqutaasussat anguniarpagut. 2020-mi innaallagissamik, imermik aamma kiassaanermik nioqquteqarnitta 70 %-a ataavartumik nukissiornermit aallaaveqarput. 2030-p tungaanut anguniarparput 100 %-imik ataavartumik nukissiornissaq. Nukissiorfinni sulisut 400 tamarmik killiliussanik pitsaasunik atugaqarnissaanik pilersitsineq iluatsilluarparput. Tamanna pillugu anner-tunerusumik atuarit uani www.nukissiorfiit.gl.