Ilisimatusarfiup atuagaateqarfiani assigiinngitsunik suliaqarusuttumik, suliassatigut ikiortissamik piffissap ilaannaani sulisartussamik pissarsiorpugut - piffissallu ilaata ulapaarfiusinnaasarnera taassuma piareersimaffigisariaqarpaa.

Atorfik piaarnerpaamik isumaqatigiissuteqarnikkulluunniit inuttalerneqartussanngorlugu inuttassarsiuunneqarpoq - sapaatillu akunneranut akunnerit suliffiusartussat 30-jupput.

Ilisimatusarfiup atuagaateqarfia Ilimmarfimmiippoq Groenlandicalu atuagaateqarfeqatigaa. Atuagaateqarfimmik atuisut, ilinniartut 750-it missaat sulisullu 100-t missaanniittuut, Ilisimatusarfiup sullippai - Ilisimatusarfillu ullumikkut ataatsimik atuagaatilerisoqarlunilu marlunnik ilinniartutut ikiorteqarpoq.

Suliassatit tassaassapput:

• Atuagaateqarfiup systemianut atuakkanik nutaanik nalunaarsuineq.
• Atuagassianik nutaanik tigusineq atuisunullu atuagassianik piareersaaneq.
• Pisariaqartitsisoqartillugu atuakkanik inniminniineq.
• Atuakkanik utertinneqarsimasunik inissitsiterineq.
• Tunissuteqartoqartillugu atuagaatinik misissueqqissaarineq.
• Atuagaateqarfimmi suliassat allat takkuttut.

Naatsorsuutigaarput:

• Sullisserusussuseqartuusutit saaffikkuminartuullutillu.
• namminersorlutit sulisinnaasutit.
• akisussaassuseqartuullutillu aaqqissuussillaqqittuusutit.

Attavissat/paasissutissat:
Atorfik pillugu paasisaqarnerorusukkuit Atuagaatilerisup Bolethe Olsenip attaviginissaanut tikilluaqqusaavutit oqarasuaammut uunga +299 385606 kiisalu bool@uni.gl .
Ilisimatusarfik pillugu paasisaqarnerorusukkuit ugguuna atuarnerusinnaavutit: www.uni.gl.

Ilisimatusarfik pillugu
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut qulingiluaallutik taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
 
Ilisimatusarfik sisamanik instituteqarpoq:

• Ilinniartitsinermik Ilisimatusarfik
• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik
• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.