sullissivik.gl
Atorfimmut ussassaarummut oqaatsinut allanut nuunniarlutit tooruk
Malugiuk atorfimmut allagarsiissutaasumut matumunnga piffissaliussaq naareerpoq!
Atorfimmut allagarsiissutaasumut qinnuteqarnissamut piffissaliussaq qaangiutereerpoq, aammalu atorfik qinnuteqarfigineqarsinnaajunnaareerppoq. Allagarsiussaq innersuussivittuinnaq takutinneqarpoq.

Ilisimatusartartussarsiorneq/Seniorforskerissarsiorneq

Namminersorlutik Oqartussat

Nuuk
Ikkunneqarpoq: 19-10-2021
Piffissaq atuuffissaa naassaaq: 13-11-2021
Suliffissamut ID normut: LJA-82839575
Atorfeqarnermi atugassarititaasut: Tamakkiisoq
Suliassaqarfik: Ingeniøri & pinngortitalerineq

ILISIMATUSARTARTUSSARSIORNEQ/SENIORFORSKERISSARSIORNEQ

Aalisagaqassuseq – Nakkutilliineq – Peqassutsinik misissuineq – Siunnersuineq
Pinngortitaleriffimmi Aalisakkanut Qalerualinnullu Immikkoortortaq Kalaallit Nunaanni aalisak­kanik qalerualinnillu peqassutsinik pillugit misissuisarnermik pingaarnerutillugu suliaqartussamik senior­forskeris­sarsiorpoq/ilisimatusartartussarsiorpoq. Aalisarneq Kalaallit Nunaanni inuussutissarsiutini pingaarner­saammat aalisagaqassuseq pillugu nalilersuisarneq siunnersuisarnerlu Kalaallit Nunaanni inuiaqatigiinnut pingaa­rute­qarluinnartuuvoq.

Pingaarnerusutigut suliaqarfiusussat:

  • Aalisakkanik qalerualinnillu peqassutsit pillugit paasissutissaatinik misissueqqissaarnerit peqassutsillu pillugit naatsorsuinerit.
  • Pinngortitaleriffiup umiarsuaaniit imaani misissuinerit
  • Ilisimatusarneq uumassuseqatigiiaallu pillugit ilutsinik takussutissiarineqatartunik ineriartortitsineq. Akunnnerit sulinermut atugassiaasut sisamararterutai immikkoortortap susassaqarfiata iluani nammineq ilsimatusarnermut saqqummiussaqartarnermullu atugassiarineqarput.
  • Aqutsisunik, politikerinik allanillu attuumassuteqartunik siunnersuisarneq kiisalu ilisimatuussutsikkut paasissutissanik tamatigoortumik paasissutissiisarneq.
  • Peqassutsinik nalilersuisarnermut tunngasut pillugit nunat tamalaat akornanni suleqatigiissitaliat ukiumoortumik ataatsimeeqatigiittarnerinut kiisalu ICES-imi/NAFO-milu ataatsimeeqataasarneq. (angalanertaqarput)
  • Ilinniartitsinerit (bachelorinngornianut) ukiumut sapaatip akunnerini marlunni ingerlanneqartassapput.
Piginnaasaqarfiit: Qinnuteqartoq biologiimi amerlassussilerinermut tunngasuni, matematikkimi imaluunniit naatsorsueqqissaarnermi, aalisagaqassuserlu pillugu naatsorsuisarnermi periaatsinik ilinniagaqarlunilu misilittagaqassaaq. Iluaqutaassaaq MS Access atorlugu sulisinnaanissaq. Aqut­si­sunut, atuisunut ilisimatusartartunullu paasissutissanik allakkatigut oqalunnikkullu ingerlatitsillaqqissuunissaq pingaartinneqarpoq. Tamakkua saniatigut qinnuteqartup sulianut ilisimatusarnermut malinnaaviginnit­tarner­nullu tunngassuteqartunut misilittagaqartuunissaa, nunat tamalaat akornanni ilisimatuussutsikkut oqallit­tar­finni peqataasarnikkut misilittagaqarluartuunissaa, oqartussanut siunnersuisarnermik misilittagarnissaa kiisalu ilisimatuussutsikkut atuagassiani saqqummiussaqartarsimanissaa pingaartinneqarput.

Forskerimut piumasaqaatit:
  • Paasissutissanik suliaqarnermut misilittagaqarneq, naatsorsueqqissaarnernit paasissutissaatinik misissueqqissaarsinnaaneq, soorlu R atorlugu.
  • Paasissutissaatinik suliaqarsinnaaneq, tamatumani paasissutissaatit ineriartortinnissaannut, soorlu Access atorsinnaanissaa iluaqutaassaaq.
  • Pilersaarusiorsinnaaneq sulianillu malinnaaviginninnermut tunngasunik suliaqarsinnaaneq.
Seniorforskerinut piumasaqaatit
  • Imaani uumasut pillugit ilisimatusarsimanermut uppernarsaateqarnissaq, seniorforskerit suliaattut.
  • PhD-mik naammassinnissimanissaq.
  • Programmilerinermut, matematikkimut naatsorsueqqissaarnermillu suliaqarnermut uppernarsaa­tita­lim­­mik misilittagaqarneq.
  • Paasissutissaatini paasiuminaassinnaasuni amerlassutsinut tunngasunik misissueqqissaarnermik misi­lit­tagaqarneq. 
Qinnuteqartut pimoorussisuullutik, sungiussiasuullutillu suleqatikkuminartuunissaat kiisalu nunani tamalaani ilisimatusartartut silarsuaanni sulerusussuseqartuunissaat naatsorsuutigaarput. Kalaallit Nunaanni pissutsinut ilisimasaqartuuneq aammalu kalaallit oqaasinik ilisimasaqartuuneq iluaqutaaginnassapput.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Pinngortitaleriffik pillugu paasisaqarnerorusuttunut paasissutissat suliffeqarfiup nittartagaani uaniipput: www.natur.gl  imaluunniit immikkoortortami pisortamut toqqaannartumik paasiniaasoqarsinnaavoq: Helle Siegstad, oqarasuaat +299 361200, e-mail:  helle@natur.gl

Ulloq qinnuteqarfissaq kingulleq 12.november 2021

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.

Pinngortitaleriffik pinngortitamik qitiusumik ilisimatusarfiuvoq Kalaallit Nunaanni Namminersorlutik Oqartussanit pigineqartoq. Pinngortitaleriffik ilisimatusarnermit paasisat tunngavigalugit Kalaallit Nunaanni eqqaanilu pisuussutinik uumassusilinnik atuinerup piujuaannartitsinermik tunngavilimmik ingerlanneqar­nissaanut, avatangiisinik uumassusillillu assigiinngisitaartuarnissaannik qularnaarinninnissamut aqqutissiue­qataasussaavoq. Pinngortitaleriffik Nuummiittoq Kalaallit Nunaanni pisuussutinut uumassusilinnut tunngatillugu apeqqutini Namminersorlutik Oqartussanut siunnersuisartutut atuuffeqartoq 67-it missaanni sulisoqarpoq.
 

 

Inuit akornanni attaveqaatit
LinkedIn-mut ikkuguk
Google+-mut ikkuguk
Suliffeqarfiup inissisimaffia