Oqaasileriffik 1. januaari 2024-mit immikkut isumaqatigiissuteqarnikkulluunniit piffissami killilikkami inatsisilerituussarsiorpoq. Suliniummut atatillugu atorfiunera pillugu ukiumut ataatsimut killiligaavoq, qaammalli ataaseq marlulluunniit sivitsorneqarsinnaalluni.

Inatsisilerinermi kalaallisut taaguusersuutinik ineriartortitseqataarusuppit? Inatsisilerinermi kalaallisut taaguutinik assigiimmik atuisoqarlernissaa siunertaralugu taaguutillu amigaataasut ineriartortinniarlugit Oqaasileriffimmi suliniuteqarpugut.

Suliniut aallarteqqammerpoq, maannalu taaguutit pioreersut pisortat suliffeqarfiutaanni oqartussaaffeqarfinnilu assigiinngitsuni atorneqartut katersorneqaleruttorlutik. Katersuereernermi taaguutit katersat isumasiuutitalersorneqassapput (nassuiaasersorneqassapput) assersuutitalersorneqarlutillu, kalaallisullu taaguutit pisariaqartinneqartut pilersorneqassallutik - inatsisileritooq inatsisilerinerimi immikkut ilisimasalittaralugu.

Inatsisilerituujuit Nunatsinnilu inatsisilerinerup silarsuaani allanngueqataarusulllutit? Suliaqarfinni assigiinngitsuni inatsisilerinermi taaguutinik assigiimmik atuisoqalernissaa siunertaralugu kalaallisut taaguutinik ineriartortitsilluni suliaqarnissaq pissanganartippiuk? Maanna periarfissaqarputit atorfik pissanganartoq qinnuteqarfigissallugu. Nunatsinni inatsisilerinermi taaguutinik atuisut akornanni allaffissorneq attaveqaqatigiinnerlu oqilisaaffigeqataajuk!

Suliniummi inatsisilerinermik immikkut ilisimasalittut suliassatit tassaassapput:

• Inatsisilerinermi taaguusersuutit ineriartortinneqarnissaat siunertaralugu katersineq, nalunaarsuineq, misissuineq takussutissiornerlu
• Inatsisilerinermi taaguutit isumasiuutitalersorneqarnissaat assersuutitalersorneqarnissaallu siunertaralugu taaguutinik suliaqarneq
• Taaguutit isumasiuutaat najoqqutaralugit kalaallisut taaguutissanik siunnersuusioqataaneq
• Inatsisilerinermi taaguutit pillugit Oqaasileriffimmi taaguusersuuserisunut siunnersuineq ilitsersuinerlu
• Sullissivinnik suliffeqarfinnillu allanik ulluinnarni inatsisilerinermi taaguutinik atuisartunik suleqateqarneq

Piginnaasassatit piumasaqaatillu

• Inatsisilerinermi BA-tut ilinniarsimaneq, cand.jur. imaluunniit cand.merc.jur.
• Oqalunnikkut allannikkullu attaveqaqateqarluarsinnaaneq, kiisalu taaguutinik paasiuminaassinnaasunik paasinarsaalluarsinnaaneq
• Suleqateqallaqqissoq, ataqatigiissaarilluarsinnaasoq nutaaliorsinnaalluartorlu
• Nalilersuilluarluni misissuilluarsinnaasoq, namminersorsinnaalluartoq suliniummillu ingerlatsilluarsinnaasoq
• Suliassat suliarineqarnissaat pillugu akisussaassuseqarluarnerminik takutitsilluarsinnaasoq
• Oqaatsitigut piginnaasassat: Kalallisut ilitsoqqussaralugit oqaatsitut, qallunaatut tuluttullu

Sulinermi piffissaq sapaatip-akunneranut nalunaaquttap akunneri 40-t.

Oqaasileriffik pillugu
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup ataani ingerlatsivik inatsisit kalaallit oqaasiinut tunngasut tunngavigalugit suliassanik ingerlatsisoq. Annertunerusumik nittartakkami www.oqaasileriffik.gl-imi atuarit.

Paasissutissat annertunerusut
Atorfik pillugu annertunerusumik paasisaqarusuttut Oqaasileriffimmut saaffiginnissinnaapput, uunga:
- Beatrine Heilmann, Oqaasileriffimmi pisortaq (behe@oqaasileriffik.gl, tlf.: +299 38 40 61).

Qinnuteqarnissamut killigititaq
Qinnuteqaat, ilinniarsimanermut uppernarsaat CV-lu tiguneqareersimassapput: - tallimanngorneq 22. decembari 2023.

Atorfiniffissaq
- 1. januaari 2024 immikkulluunniit isumaqatigiissuteqarnikkut.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "Qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.