Unamminarsinnaasunik nutaanik sapiissuseqarpit, siuariartuutaasinnaasunillu takorluuisinnaassuseqarlutit, taava PI/SPS-imi Perorsaanermik Ilinniarfimmi Ilulissaniittumi Piorsaavimmi ataqatigiissaarisutut atorfik soqutiginartoq inuttassarsiorneqarpoq. PI/SPS Kalaallit Nunaanni perorsaanermik seminariatuaavoq, nunarsuarmi kangerluit iigartartullit annersaat kusanarnerpaallu, nunarsuup kingornutaatut erligisassatut UNESCO-mit ilanngunneqarsimasup, qanittuani inissisimaffeqartoq.
Nuna tamakkerlugu PI/SPS-ip suliassaqarfii atuuffiilu pingaarutillit makkuupput:

• Piukkunnaateqartunik Perorsaasunngornianik, socialassistentinngornianik isumaginninnermi ikiortinngornianik, ulluuneranilu meeqqanik sullisinermi ikiortinngorniani ilinniartitsineq
• Perorsaanermik suliassaqarfik tamakkerlugu pikkorissarnernik ilinniagaqaqqinnernillu isumaginninnerup iluani ingerlatsineq
• Perorsaanermik suliassaqarfimmi ineriartortitsinermut isummersuineq – suliatigut ilinniartitaanernullu tunngasutigut

Seminaria 250 missaanik ilinniartoqarpoq ilinniartitaanernut assigiinngitsunut agguataarsimasut.  Taamatuttaaq perorsaanilerinerup iluani Kalaallit Nunaanni ulloq unnuarlu paaqqinnittarfinni sulisunut ilinniarsimanngitsunut ilinniarsimasunullu pikkorissarnissanut neqerooruteqartarpugut. Ilinniarfik nammineq Caféqarpoq/neriniartarfeqarpoq Ilinniartunullu ineqarfiinut allaffeqarfeqarluni.  45-nik sulisoqarpugut taakkunannga affaata missaat ilinniartitsisuullutik.
Pikkorissartitsisarnerit qaffariartuinnavippoq piumaneqaraluttuinnavillunilu PI/SPS-ip maluginiarpaa kissaatigalugulu ineriartuinnavinnissaa. Inuiaqatigiinni inuit tamat eqqarsaatigalugit siunissamut ilusileeqataanissatsinnut takorluugaqarpugut, pingaarnerutillugit meeqqat, inuusuttut aammalu immikkut ajornartorsiutillit. Kalaallit Nunaanni inuiaqatigiit iluanni ilinniartitaaneq piginnaanngorsarnerlu aqqutigalugit nunatsinni tapertaarusuppugut kivitseqataarusullutalu, tamannalu pikkorissaaviup angorusuppaa Kalaallit Nunaanni perorsaanilerinerup inuiaqatigiinnilu pissutsit iluini ineriartuutaasinnaasunik pikkorissaanerni siuttuulluni. 
Piorsaavik PI/SPS-illu immikkoortortaqarfii ilinniartitaanernilu ilinniartitsisut qanimut suleqatigiipput. Suliassanut tunngatillugu naammassiniagassanut PI/SPS-imi ikioqatigiittarpugut. 

Pikkorissartitsinernut ataqatigiissaarisup suliassarai:

• Pikkorissaassutissat ataqatigiissarlugit, pilersaarusiorlugit, nalilerlugillu
• Pikkorissaassutissanik nutaanik ineriartortitsilluni, imassai, ingerlanissaa, ilikkagassatigut eqqarsaatigisariallit (didaktiske overvejelser)
• Pisariaqartitsineq aallaavigalugu pikkorissaanerni ilinniartitaanernilu ilinniartitsineq
• Ujartuilluni sulisassalluni, pikkorissartitsinernillu ujartorneqartunik suliaqartassalluni.
• Allaffissorneq eqqarsaatigalugu pikkorissaanermi ilinniartitaanernilu tapersiisassalluni, soorlu oqarasuaatikkut, mail-itigut, annikitsunik nutserisarnissaq, pikkorissartunut angallannermi/hotel-inullu inniminniinerit, pikkorissaanermilu missingersuutinut/aningaasaqarnikkullu akuersissutsinik pikkorissaanernut atugassanik qinnuteqarneq. 
• PI/SPS-imi ineriartortitsinernut naliliillunilu suliassanut peqataasarnissaq

Piorsaavimmi aqutsisoq eqaatsoq ineriartortitsinissamut isumaliuteqarsinnaasoq, suleqateqallaqqitsoq, suleqatikkuminartorlu pissarsiarerusupparput. Suliassaqarfiit iluani suliat nuannaralugit avatatiigisitit suliassatillu pitsaasumik naapiffeqarsinnaasoq, sulianut kusanartumik tunniussaqarsinnaasoq.

Qinnuteqartuni ilinniakkamik atuilluarsinnaaneq piginnaasallu makku pingaartinneqarput:

• Inuussutissarsiutini inulerinermi, perorsaanermut attuumassutilimmik uppernarsaatitalimmik misilittagaqarlutit aamma isumaginninnermi / inuiaqatigiilerinermi suliassaqarfiup iluani.
• Ilinniartitsinermik misilittagaqartoq.
• Pikkorissartitsinernik, ingerlatsinermik misilittagaqartoq.
• Suliassarpaaluit namminersorlutit suleqateqarlutillu aaqqissuullugit ataqatigiissarlugit
• Suliassarpaaluit ataatsikkut naammassineqarnissaannut ingerlatsisinnaasoq
• Kalaallit Nunaanni misilittagaqartoq, ilisimasaqartoq, kulturillu allat aallaavigalugit sulinissaq ammaffigalugu.
• Pikkorissartitsinernut ataqatigiissaarisutut kalaallit qallunaallu oqaasiinik piginnaaneqarneq iluaqutaassaaq.

Paasissutissat sukumiinerusut oqarasuaat +299 38 35 50 sianerluni pissarsiarineqarsinnaapput imaluunniit uunga saaffiginninnikkut: Tullersorti, Marianne Nissen, e-mail-ikkut: allaffik@pi.sps.gl

www.pi.sps.gl-imi Seminaria pillugu paasisaqarnerusinnaavutit.

Atorfiup aprilip 15-ani 2023-imi imaluunniit isumaqatigiissuteqarnikkut inuttalerneqarnissaa kissaatigineqarpoq.
Qinnuteqarfissaq killilerneqarpoq maajip 4-ani 2023 nal. 08:00 (Kalaallit Nunaata kitaata nalunaaqutaat malillugu).

E-mail-ikkut qinnuteqaatinik tigusineq ajorpugut.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.