Naalakkersuisut Siulittaasuata Naalakkersuisoqarfiani Inatsisilerinermut immikkoortortaq inatsisilerituumik pisortat inatsisaannik, pingaartumik pisortat ingerlatsinerat aamma inummut paasissutissat pillugit inatsisinik soqutigisalimmik ilisimasalimmillu pikkorissumik pissarsiorpoq. Inatsisilerinermut immikkoortortaqarfimmi inatsisilerinermi malittarisassaliornernilu pitsaassutsinik qulakkeerinninnerit, suliassanik suliarinninnerit, inatsisinik nassuiaanerit aamma allakkianik inatsisinut tunngasunik akissutinillu suliarinninnerit isumagineqartarput.

Naalakkersuisut Siulittaasuata Naalakkersuisoqarfia
Naalakkersuisut Siulittaasuata Naalakkersuisoqarfiata Naalakkersuisut Siulittaasuat sullittarpaa. Naalakkersuisut Siulittaasuata Naalakkersuisoqarfianiipput Aqutsisunut allattoqarfik, Inatsisilerinermut immikkoortortaq, Ingerlatseqatigiiffinnut Allattoqarfik aamma sulisoqarnermut (HRU) allaffik. Tamatuma saniatigut Digitaliseeriinermut Aqutsisoqarfik aamma Naalakkersuisut Siulittaasuata Naalakkersuisoqarfiata ataaniippoq.

Inatsisilerinermut immikkoortortaq
Inatsiseqarnermut immikkoortortap suliassai ilaatigut makkuupput:

• Naalakkersuisoqarfiit ataasiakkaat, Inatsisartut allaffeqarfiat danskillu oqartussaasui suleqatigalugit inatsisissanik piareersaanermi ikorfartuisarneq pilersaarusiortarnerlu.
• Inatsisartut inatsisissaattut siunnersuutit, Namminersorlutik Oqartussat nalunaarutaat, Kommunit ileqqoreqqusaat aamma suliassaqarfiit assigiinngitsut akornanni kaajallaasitat inatsisilerinikkut pitsaassusaannik qulakkeerinninnerit taakkunanngalu atortussanngortitsinerit nalunaarutiginnittarnerillu.
• Naalakkersuisut siulittaasuannik Naalakkersuisoqarfinnillu inatsiseqarnikkut siunnersuisarneq, tassunga ilanngullugit inatsisit tunngavigalugit allakkiortarneq akissuteqaasiortarnerlu.
• Naalakkersuisoqarfiit akornanni pisortat ingerlatsineranni inatsiseqartitsinermut suliassanik suliarinninnerit taakkualu pillugit ilitsersuisarnerit.
• Inatsisitigut pitsaassutsit, sulianik suliarinnittarneq aamma inatsisitigut sammisat allat pillugit pikkorissartitsinerit.
• Naalakkersuisut Inatsisartullu naalakkersuinikkut sunniiveqatigiittarnerannut tapersiisarneq aamma inatsisissap piareersarneqarnissaanut ataatsimiititaliap suliaqarneranut peqataasarneq.
• Inatsisartut ataatsimiiffissaannik ataqatigiissaarineq, tassunga ilanngullugu ataatsimiinnerni Naalakkersuisunit oqaluuserisassanngortitanik nalunaaruteqarneq.

Naalakkersuisut Siulittaasuata Naalakkersuisoqarfimmi Inatsisilerinermut immikkoortortaqarfimmi inatsisilerituutut atorfeqassaatit suliffimmi unamminartumi eqeersimaartumilu.

Ilinnut tunngasut

• Ba.jur.-itut imaluunniit Cand. jur.-itut ilinniarsimasuuvutit pitsaasumik atuagarsornikkut tunuliaquteqarlutit. Ilinniakkaminnik naammasseqqammisut aamma kajumissaarpagut atorfimmut qinnuteqaqqullugit.
• Pisortat inatsisaannik tamakkiisumik, ingammik pisortat ingerlatsineranni inatsiseqartitsinermik aamma inummut paasissutissat pillugit inatsisinik immikkut ittumik soqutigisaqarputit.
• Suleqatigiinnut amerlanngitsunut ilaalerusupputit, suliassanik namminerisamik suliassaqarlutit.
• Suleqatigiuminartuuvutit, isumasioqatigiuminartuuvutit aamma suleqatinnut ilisimasannik avitseqatigiillaqqissuullutit.
• Oqaatsitigut allattariarsornikkullu attaveqarluarsinnaassuseqassaatit.
• Qiimasuussaatit suleqatigiillu persuarsiorpallaanngitsut akornanniinnissaq kajumissuseqarfigissavat.

Kalallisut/danskisullu oqaaseqartuuneq iluaqutaassaaq.

Qinnuteqartut pisariaqartinneqartunik misilittagallit immikkut siunnersortitut atorfinitsinneqarsinnaapput.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.