Nanortalimmi allaffissornikkut pisortaq

Nanortalimmi allaffissornikkut pisortaq

Nanortalimmi allaffissornikkut pisortarsiorpugut oktobarip ulluisa aallaqqaataani 2024 imaluunniit isumaqatigiissuteqarnikkut atorfinittussanik.

Nanortalimmi allaffissornikkut pisortatut kommunip innuttaasunut sullissivia Sullissivik akisussaaffigissavat kiisalu kommunip akisussaaffeqarfiisa ataanni ingerlatsivinni pisortat peqatigalugit aqutsisutut ersarissuunissaq akisussaaffivit ilagissavaa. Teknikkikkut, aningaasatigut sulisutigullu atorluaanissaq aammalu sinaakkutissat malittarisassallu aallaavigalugit sapinngisamik najukkami aalajangiisarnissat pingaartissavatit.

Naatsorsuutigaarput allaffissornikkut pisortatut sulisunik aqutsinermik attaveqaqatigiinnermullu pitsaasunik ilisimasaqarluartutit. Allaffissornikkut pisortatut pingaarteqarpoq pisortanik ingerlatsinermik/inatsisinik tunngaviusumik ilisimasaqarluartuunissat aammalu ulapaarfimmi eqqissisimallutit tamakkiisumik isiginnittuusinnaanerit pingaaruteqarpoq. Atorfimmi piginnaasat inuttullu piginnaasat assigiimmik pingaartinneqarput.

Ulluinnarni ulapaarluni sulinermi aalajangiinerit, pilersaarutit suliatigullu piginnaasat pitsaasut attannissaannut suliniutit pisortaqatigiit peqatigalugit suleqataaffigissavatit.

Kommune Kujalleq Kalaallit Nunaanni kommunit kujallersaraat 6.140-inik inoqartoq (2024) katillunilu 53.000 km2-inik angissuseqartoq. Taamaammat Kalaallit Nunaanni kommunit minnersaraat.

Kommunimiipput qanga Nanortallip Kommunerisimasaa, Qaqortup Kommunerisimasaa kiisalu Narsap Kommunerisimasaa, 2009-mi januaarip aallaqqaataani kattullutik Kommune Kujallinngortut.

Illoqarfiit pingasut (Nanortalik, Qaqortoq aamma Narsaq) saniatiguttaaq aqqanilinnik nunaqarfeqarpoq 37-nillu nunaleriveqarluni (savaateqarfiit, tuttuuteqarfiit nersussuaateqarfiillu). Kommune Kujallermi inuiaqatigiit ullumikkut nutaalianngorsimapput, niuertarfeqarnikkut takornariartitsinikkullu sorpassuarnik umigassaqalersimalluni, soorlu akunnittarfiit / unnuisarfiit, umiatsianik qulimiguulinnillu takusassarsiortitsinerit, inuussutissarsiornikkut eqeersimaarfiusoq, nunaleriffiusoq, takornariartitsiviusoq kiisalu illoqarfinni tamani nunaqarfinnilu qassiini tunisassiorfeqarluni annertusiartuinnartumik aalisarfiusoq.

Atorfimmi akisussaaffiit ilaatigut ukuupput:

Politikkikkut allaffissornikkullu akisussaaffeqarfiit:

• Allattoqarfimmi pisortaq suleqatigalugu nunaqarfinnut siulersuisut sinnerlugit Nanortallip nunaqarfiinik sullissinissamut akisussaasoq.
• Nanortalimmi najukkami siulersuisut sullinnissaannut akisussaasoq (kulturilerinermut suliassaqarfik suleqatigalugu - ersarissumik akisussaaffiit agguataarneqassapput!)
• Ataatsimiititalianut attuumassuteqartunut nunaqarfinnullu siulersuisunut sulianik saqqummiussassanik inassutinillu suliaqartarnissamut akisussaasoq.

Allaffissuutiginninneq akisussaaffiillu

• Sullissivimmi eqqortumik pitsaasumillu suliaqarneq
• Immikkoortortani pisortat isumaqatigiissuteqarfigineratigut sulianut aaqqiissutissarsiniarnermi sumiiffinni sunneeqatigiinnissamik suleqatigiinnissamillu qulakkeerineq.
• Maalaarutinik suliaqarneq tusarniaanissamullu ilassuteqarneq
• Suliat ingerlanneqarnerisa ineriartornissaannut tapersiineq, taamaasilluni suliassaqarfiit akimorlugit pitsaanerusumik sukkanerusumillu suliat aalajangiivigineqarsinnaassammata.
• Pisortaanerit suleqatigalugit ataatsimoorussamik periusissianik aallussineq.
• Uppernarsaatit, suleriaatsit ingerlatseriaatsillu qitiutillugit sapinngisamik pitsanngorsaaviginissaat qulakkeeqataaffigissallugu.
• Patajaatsumik aningaasaqarnermi ingerlatsinermut aammalu eqqortumik missingersuusiornissamut suleqataaneq.
• Suliassaqarfimmi ingerlatsinermi ineriartortitassat malitseqartinnissaat siunnersuuteqarfiginissaallu.
• Attaveqaqatigiinneq suleqatigiinnerlu

Aqutsinikkut akisussaaffeqarfiit

• Illoqarfigisami nunaqarfittaanilu innuttaasunik sullissiviup ingerlannera missingersuutaalu akisussaaffigalugit.
• Illoqarfigisami innuttaasunik sullissiviup aningaasaqarnerata aqunnera missingersuutillu malinnaavigineqarnerat qulakkeerlugit.
• Ingerlatsiviit tamarmik inatsisit malillugit sulinissaat qulakkeerlugu.
• Paasissutissat, suleriutsit periutsillu aallunneqarnissaat qulakkeerlugu.
• Suliatigut ajornartorsiutit suussusersillugit malitseqartitsisoqarnissaalu qulakkeerlugu.
• Sulisunik oqaloqatiginninnermik ingerlatsineq
• Ingerlatsivinni pisortat, suliassaqarfinni pisortat immikkoortortanilu aqutsisut suleqatigalugit politikkikkut anguniakkat suliassaqarfinni ingerlanneqarnissaat qulakkeerlugit.
• Kommunip allaffiani eqqiaasut akisussaaffigalugit.
• Nanortalimmi nunaqarfittaanilu politikkikkut aaqqissukkat assigiinngitsut ataqatigiissarlugillu piareersarlugit.

Tamatuma saniatigut illoqarfimmi malinnaallutilu susoqarneranik tusarniaasarnissat pissusissamisoorpoq.

Piginnaasassatit:

• Aqutsisutut ilinniarsimasuuneq aqutsisutullu misilittagaqartutit
• Missingersuusiornermut naatsorsuuserinermullu misilittagaqartutit
• Periutsinik aqutsinermut misilittagaqartutit - ilisimasaqartutilluunniit
• Pisortat ingerlatsinerannut malittarisassanik / inatsisinik ilisimasaqartutit
• Nammineersinnaassuseqartutit kiisalu suliassaqarfinni assigiinngitsuni akimut suleqatigiinnerup iluaqutissartaannik takunnissinnaassuseqartutit
• Ineriartortitsinermik siunertaqartuusutit kiisalu allannguinissamut ineriartornissamullu piumassuseqartutit
• Suleqatigiinnissamut ataveqaqatigiinnissamullu pitsaasumik piginnaasaqartutit.
• Qiimasuullutillu isumagissuusutit kiisalu siammasissumik inunnik isiginnittaaseqartutit
• Tamakkiisumik takunnissinnaalersitsinermut piginnaanilik aamma ulloq ulapaarfiusoq isumaginniffigisinnaallugu
• Siuttuunissamut sapiissuseqarlutit eqaatsumillu periuseqarsinnaasutit
• Suliffimmi akuersaartumik periuseqartutit

Akissarsiat atorfeqartitaanermilu atugassarititaasut:
Akissarsiat ASG-p isumatigiissutaa aallaavigalugu akissaateqarfimmi 36-mut aalajangersagaapput. Akissarsiat atorfeqarnermilu atugassarititaasut, atorfeqarnermi soraarnermilu angalanissamut pisattallu nassiunneqarnerannut sulisitsisumit akilerneqarsinnaatitaanermut malittarisassat uani ilaapput, taakkua Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit pissapput.

Inissaq:

Atorfinitsinneqanermut atatillugu inissaqartitsisoqarsinnaavoq, malittarisassat atuuttut najoqqutaralugit ineqarnermut akiliutit allallu akilerneqartartussamik.

Atorfik pillugu paasissutissat sukumiinerusut uunga saaffiginninnikkut pissarsiarineqarsinnaapput: Allattoqarfiup pisortaa Max Heilmann Larsen, mailikkut mahl@kujalleq.gl imaluunniit oqarasuaat 648020.

Qinnuteqaat, pineqaatissinneqarsimannginnermut uppernarsaat, ilinniagaqarsimanermut paasissutissat suliffigisimasallu nalunaarsornerat kiisalu soraarummeersimanermit uppernarsaatit assilineri il.il. PDF-filinngorlugit kommunip nittartagaatigut kingusinnerpaamik aggustip ulluisa 25-iat 2024 nassiunneqariissapput.

MALUGIUK: Qinnuteqaatit pappilissatigut e-mailikkulluunniit tiguneq ajorpagut, inussiarnersumik qinnuteqaatit PDF-fil-inngorlugu nittartagaq aqqutigalugu nassiunniunneqassapput..

”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqarpoq. Tamanna januaarip aallaqqaataani 2018-imi atuutilerpoq. Paasissutissat sukumiinerusut Sulisoqarnermut Immikkoortortaqarfimmut piniarneqarsinnaapput ”