Fagchef

Avannaata Kommunia sanaartornermi, illoqarfimmi pilersaarusiornermi nunaminertanullu tunngatillugu fagchefissarsiorpoq

Sanaartornermi, illoqarfimmi pilersaarusiornermi nunaminertanullu tunngatillugu fagchef-itut atorfik 1. november 2023, isumaqatigiissuteqarnikkulluunniit, inuttassarsiuunneqarpoq. Soqutiginnittut qinnuteqaqquneqarput.

Suliassat akisussaaffiillu:

Avannaata kommunia suleqatissarsiorpoq sanaartornermut, pilersaarusiornermut nunaminertanullu fagchef-imik misilittagalimmik. Ukiuni kingullerni kommunimi sanaartorneq ukkatarineqarpoq. Taamaattumik fagchefitut kommunimi ineriartorneq sunniuteqaqataaffigisinnaavat sanaartugassanullu ineriartortitsinermullu pilersaarutit peqataaffigalugit.

Suleqatigilissavatit Kalaallit Nunaata avannaani Teknikkimut Avatangiisinullu Ingerlatsivimmi suleqatigiit 300-t sinneqartut, taakkunannga Ilulissani qitiusumik allaffeqarfimmi 24 miss. sulisarput. Fagchefitut qaninnertut pisortaaffigissavatit sulisut 12-it agguataarsimasut sanaartornermut, pilersaarusiornermut nunaminertanullu immikkoortortaqarfinnut. Taamaalillutit tunuliaqutserluarneqassaatit isumassarsioqatigisartagassarnik suliassanillu suleqatigisartagassarnik. Fagchefip qaninnertut pisortarissavaa Teknikkeqarnermut Avatangiisinullu Pisortaq. Tamatuma saniatigut ulluinnarni allaffeqarfimmi pisortaq, stabschef, ingerlatsivimmilu fagchef-it allat suleqatigisassavatit.

Atorfimmut inuk ujartorneqarpoq suliniutinut akisussaaffeqarsinnaalluartoq, suleqatinillu inerisaalluarsinnaasoq, kiisalu suleqatigisanik innuttaasunillu suleqateqarnermik nukittorsaasinnaasoq.

Sanaartukkat qanoq ingerlariaaseqartarneri ilisimasaqarfigilluarpatit aammalu sanaartugassanik pisortatut aqutsineq misilittagaqarfigalugu uppernarsaatitalimmik.

Suliassat:  

• Inatsisit atuuttut politikkikkullu aalajangikkat najoqqutaralugit qulakkiissavat suliassat isumaliutigilluakkamik naammassiniarneqarnissaat suliassaqarfiup iluaniittut, kiisalu sanaartukkat nutaat isumagalugit. Sanaartugassat akuerineqarsimasut tamarmik suliariumannittussarsiuunneqarneriniit atorneqalernissaasa tungaanut akisussaaffigisassavatit. Missingersuutit iluanni suliassat suliarineqartarnissaat aamma akisussaaffigissavatit.
• Suleqatitit peqatigalugit nunaminertanik sanaartorniarluniluunniit qinnuteqaatit pinasuartumik suliarineqartarnissaat qulakkiissavat. Tamanna anguneqassaaq annertunerusumik digitaliserinikkut suleriaatsinillu eqaallisaanikkut. Tigussaasunik sukumiisunillu suleriaasissiornikkut illup iluani avataanilu suleqatigisanik eqaatsumik suleqateqarneq qulakkeerneqassaaq.
• Illoqarfiup iluani pilersaarusiorneq siumut tamakkiisumillu isiginninneq tunngavigalugu inatsisillu atuuttut naapertorlugit qulakkeerniassavat. Tamanna pissaaq ammasuunikkut, kommunimilu innuttaasunik siunnerfilimmik paasissutissiisarnikkut peqataatitsinikkullu. Fagchef-itut akisussaaffigissavat kommunimut pilersaarummut tapiliussassanik nutaanik suliaqarneq pilersaarutinilluunniit nutarterineq, tamanna pisariaqartinneqaraagat.
• Sanaartornermut suliassaqarfimmi missingersersuusiortassaatit missingersuusiornermi sinaakkutissat politikkikkullu aalajangikkat tunngavigalugit. Suliarisassavatittaaq Teknikkimut ataatsimiititaliamut inassuteqaatit, ataatsimiititaliallu ataatsimiinnerini aalajangersimasumik peqataasassallutit.

Suliassanut atatillugu piginnaasat:  

• Sanaartornerup iluani tulluartumik ilinniagaqarputit, assersuutigalugu ingeniøritut, konstruktøritut, arkitekt-itut assigisaanilluunniit.
• Pisortatut misilittagaqarputit.
• Sulianik aaqqissuussaalluartumik isumaginneriaaseqarputit immikkoortortaqarfippillu suliassaanik ataqatigiissaarillaqqissuullutit.
• Suliffeqarfimmi politikkikkut aqunneqartumi sulineq misilittagaqarfigivat.
• Sanaartornerup iluani misilittagaqarputit.
• Pilersaarusiornermi pisortatut misilittagaqarputit.
• Pilersaarusiornermut inatsit ilisimasaqarfigivat.
• Sanaartugassanik pilersaarusiorneq ingerlatsinerlu ilisimasaqarfigivatit, ilanngullugit piffissaq, aningaasanut pitsaassutsinullu tunngasut.
• Sanaartortitsisumik sanaartortussanillu isumaqatigiissusiorneq ilisimasaqarfigivat.
• Sanaartornermi pilersaarusiornermi suleqatinik isumasioqateqartarlunilu ataqatigiissaarisinnaaneq.
• Aningaasartuutinik aqutsineq nalunaarusiortarnerlu.

Fagchef-igisassatit arlaliummata naatsorsuutigineqanngilaq suliassaqarfiit tamaviisa iternga tikillugu ilisimasaqarfigerujussuassagitit. Taamaattorli naatsorsuutigineqarpoq suliassaqarfiit pillugit paasinnissinnaassasutit, taamaalillutit suliassanut tunngatillugu pitsaassutsikkullu qaffasissumik aalajangiisarsinnaaqqullutit.

Inuttut piginnaasat: 

• Suliffeqarfimmi politikkikkut aqqunneqartumi sulineq soqutigivat
• Sulisorisarnik kaammattuillaqqissuuvutit pisariaqarfiatigullu ikorfartorsinnaallugit
• Aalajangiillaqqissuuvutit pissutsillu allanngornerini tulluarsapallassinnaallutit
• Ingerlatsivimmi nunanit allaneersut kultoorikkullu assigiinngitsunik tunuliaqutallit suleqatigilluarsinnaavatit
• Kalaallit nunaanni inuiaqatigiinni pissutsit ilisimasaqarfigivatit

Akissarsiat atorfeqarnermilu atugassarititaasut: 
Akissarsiat atorfeqarnermilu atugassarititaasut, ilanngullugit atorfininnermi soraarnermilu angalanissamut pequttallu nassiunneqarnissaanut tunngasut pillugit najoqqutarineqassooq atorfininnerup nalaani Naalakkersuisut atorfinittussallu kattuffiata akornanni isumaqatigiissutit.

Atorfeqarnermut atatillugu inissaqartitsisoqarsinnaavoq.

Atorfik pillugu paasissutissat amerlanerusut piniarneqarsinnaapput Avannaata Kommuniani, Teknikke-qarnermut avatangiisinullu pisortamut Karl Madsen-imut, oqarasuaat 38 77 18 imlt. e-mail: kmad@avannaata.gl

Qinnuteqaat ilinniagaqarsimanermut allagartanik, sumi suliffeqartarsimanermut aamma oqaaseqaatinik ilaqartinneqartoq kingusinnerpaamik ulloq 24. september 2023 nassiunneqassapput Avannaata Kommu-niata nittartagaani Avannaata.gl/ledige-stilllinger iserfigalugu atorfiup qinnutigineqartup nalaani ”atorfik una qinnuteqarfigiuk” toorlugu nassiunneqassaaq.

Atorfinitsitsinissaq pillugu sapaatip akunnerata 39-ip ingerlanerani oqaloqatigiittoqarumaarpoq 1. november 2023 atorfininnissaq, isumaqatigiissuteqarnikkulluunniit, pillugu.