Suliffissamut ussassaarummi suliassanik suliarinninnissamut suliffeqarfiup pisariaqartitai takutinneqassapput. Qinnuteqartut suliffeqarfimmut soqutiginaateqartut tassaapput suliassarpianik taakkuninnga suliarinnissinnaasutut suliffeqarfiup isumaqarfigisai.
Taamaattumik qinnuteqaat pitsaasoq, suliffissamut qinnuteqaatigisarnut, suliffeqarfimmut illit qinnuteqarfigisarnut aammalu ilinnut – taaneqarneri malillugit tulleriinnilerlugit, tunngassuteqarpoq. Matumani isumassarsiorfissat suliffissami tiguneqarnissamut qaninnerulersitsisinnaasut takusinnaavatit.
Suliffissamut qinnuteqartunik oqaloqatiginninnissamut qaaqquneqarneq
Qinnuteqarnernut siunertaavoq suliffeqarfiup oqaloqatigerusulissagaatit. Suliffissamut qinnuteqartunik oqaloqatiginninnermi siunertaavoq kina atorfinitsinneqassanersoq paasiniarnissaa. Qinnuteqaatit allalerukku oqaloqatigineqarnissaq siunnerfigalugu allassavat.
Suliffeqarfiup pisariaqartitai qanoq aaqqiivigisinnaanerlugit oqaluuseriuk
Suliffissamut ussassaarut sulisunngortussamut piumasaqaatinik kissaatigineqartunillu arlalinnik imaqartarpoq. Piumasaqaatit taakkua qanoq naammassisimanerlugit qinnuteqaaterni oqaluttuarissavat. Taamaattoq immikkoortut tamaasa naammassisimanngikkaluarlugit suliffissamut qinnuteqarsinnaakuttoorputit. Pingaartumik kissaatigineqartut isumaqatiginninniarfigineqartussaapput.
Taavami piumasaqaatit kissaatigineqartullu qanoq immikkoortissavigit?
Piumasaqaatit saneqqunneqarsinnaanngitsut suliffissanut amerlanernut tunngassuteqartartut, amerlanerpaatigut tassaasarput ilinniagaqarsimanermut sulianullu piginnaaneqarnermut tunngassuteqartut aammalu taakkua qulequttap 'piukkunnassuseqarneq' ataani takusinnaassavatit, assersuutigalugu makkununnga assigusumik oqaasertalerneqarsimasut:
...Imatut ilinniarsimasuussaatit...
...Naatsorsuutigaarput, illit...
...minnerpaamik ukiuni … misilittagaqarputit...
...sapinngilatit...
...pisariaqarpoq sapissanngikkitit...
...piumasaqaataavoq illit...
Kissaatigineqartut tassaapput taakkua saniatigut allat tamarmik aammalu kissaatigineqartut naammassisimasariaqanngilatit. Kissaatigineqartut oqaaseqatigiit iluanniittarput, soorlu:
...iluaqutaassaaq imaattoqarpat...
... imatut … ilinniagaqarsimasoq imaluunniit … imaluunniit assigusumik...
...immaqa imatut... tunuliaqutaqarputit…
Qinnuteqaatit allalerukku piumasaqaatit saneqqunneqarsinnaanngitsut aallarniutigikkit aammalu taakkua qanoq illit naammassisimanerlugit nassuiarlugu. Tamatuma kingorna kissaatigineqartut naammassisimasatit allaaserisinnaavatit.
Pilerissuseqarnerit aalajangiisuuvoq
Suliffissamut, suliffeqarfimmut aammalu siunissami sulinerni ingerlavissarni periarfissanut tunngavilersuutigisassat tassaavoq illit pilerissuseqarnerit. Pilerissuseqarnerit takusinnaaguniuk suliffeqarfiup kajumissuseqarnerit malugisinnaassavaa – aammalu naaperusulissallutit.
Suliffissaaleqinerit, avissimanerit, siusinnerusukkut napparsimasimanerit, maannakkut suliffigisat qatsukkakku imaluunniit pisortalunnerit pissutigalugit suliffissamut qinnuteqarusulersimallutit tunngaviusutut atunngisaannakkit. Pisut taakkua maannakkut inissisimanernit qimaguterusulersimanernut pissutaasimasinnaapput, kisianni avatangiisinut nutaanut qinnuteqalernernut tunngaviussanatik.
Sooq suliffissamut qinnuteqarnerlutit oqaluttuaralugu qinnuteqaatit aallarnersinnaavat aammalu naggasersinnaallugu. Kisianni tunngavilersuutit aalajangersimasuussaaq aammalu suliassanut taaneqartunut aammalu suliffeqarfippiamut tassunga tunngassuteqassalluni, aammalu oqaaseqatigiit qinnuteqaammi sumiluunniit atorsinnaasatit atuinnassanngilatit.
'Tuniniaanermut siunnersortitut atorfimmut qinnuteqarpunga, pissutigalugu piukkunnassuseqarnikka aammalu siunissami suliffigerusutannut tassunga tulluarmata' pilerissuseqarnerunngilaq paasineqarsinnaasoq.
Kisiannili imaassaaq:
'Ilissinni tuniniaanermut siunnersortitut atorfimmut qinnuteqarpunga, pissutigalugu suliffeqarfimmi XX-imi tuniniaanernik ataqatigiissaarisutut misilittakkama atornissaannut periarfissaqartoq takusinnaagakku, peqatigisaanillu avammut samminerusumik inissisimalersinnaagama'.
Suliffissamut qinnuteqarneq aamma tassaavoq suliffeqarfimmut qinnuteqarneq
Suliffissamut qinnuteqaannanngilatit, aamma suliffeqarfimmut aalajangersimalluinnartumut qinnuteqarputit. Suliffeqarfiummi aamma, suleqatinik suleqateqarluarnermi akuulernissamut, sullittanut tunngatillugu aallartitaalluartussatut imaluunniit suleqataalluartussatut, aammalu siunissami suliffeqarfiup suliassariligassaannik malinnaanissamut, atorfinitsippaatit.
Suliffeqarfippiami tassani suliffissarpiaq taanna sooq qinnuteqarfiginerlugu oqaluttuarit. Oqaasertat suliffeqarfik pillugu ussassaarummi allassimasut atorsinnaavatit, kisianni amerlanertigut suliffeqarfiup nittartagaa alakkarlugu imaluunniit nutaarsiassani sunik nassaarisaqarsinnaanerluni takullugu, imminut akilersinnaanerusarpoq.